Fróðleikur

Legur: gerðir, stærðir og hvernig þú velur rétta legu

Þú stendur með gamla legu í hendinni og það stendur 6204-2RS á hringnum. Í því númeri er öll málsetningin, gerðin og lokin. Hér er farið yfir hvernig þú lest það, hvað d × D × B þýðir, hvaða gerðir eru til og hvað ræður valinu þegar enginn miði er lengur læsilegur.

Lesa legunúmerið

Gerðirnar

Kúlulega með gúmmílokum, keflalega kónísk, innleggslega og leguhús

d × D × BInnra mál, ytra mál, breidd. Stendur í titli hverrar legu hjá okkur

04 = 20 mmTveir síðustu tölustafirnir sinnum fimm

2RSViðskeytið. Lokin, legubilið og búrið standa þar

C3Aukið legubil. Fyrir hita og fastar mátanir

Hvað gerir lega

Lega heldur öxli á sínum stað og lætur hann snúast með sem allra minnstum núningi. Hún tekur við álaginu af öxlinum og skilar því út í húsið eða grindina, og hún gerir það með því að láta hertar kúlur eða kefli rúlla á milli tveggja slípaðra brauta í stað þess að láta málm renna á málmi.

Skýringarmynd af hlutum kúlulegu: innri hringur, ytri hringur, kúlur, búr og þétting — **Fimm hlutar.** **Innri hringurinn** situr á öxlinum og **ytri hringurinn** í húsinu. Á milli þeirra rúlla **veltiefnin**, kúlur eða kefli, eftir slípuðum brautum. **Búrið** heldur jöfnu bili á milli þeirra svo þau rekist ekki saman, og **þéttingin** heldur feitinni inni og óhreinindum úti.

Veltilega eða fóðring?

Veltilega

Kúlur eða kefli rúlla á milli hringjanna. Núningurinn er lítill, hann er nánast sá sami við ræsingu og á fullum snúningi, og legan þolir hraða.

Hún þarf nákvæma mátun, hreinlæti og rétta smurningu. Þetta er sú lega sem þessi síða fjallar um.

Rennilega eða fóðring

Öxullinn rennur beint í bronsi, plasti eða samsettu efni. Engir lausir hlutar, tekur vel við höggum og titringi og þolir óhreinindi betur.

Núningurinn er mun meiri við ræsingu og hún þolir ekki sama hraða. Þú finnur hana í liðum, sveifluörmum og hæggengum búnaði fremur en á snúningsöxli.

Lega bilar sjaldan af elli. Langalgengustu orsakirnar eru röng málsetning, röng mátun, óhreinindi og röng eða of lítil smurning. Fjórar af þessum fimm ákvarðast áður en legan fer í, og það er þess vegna sem þessi síða byrjar á málunum.

Málsetningin: d × D × B

Þrjú mál lýsa nánast hverri legu. d er innra málið, gatið sem fer á öxulinn. D er ytra málið, það sem fer í húsið. B er breiddin. Þau eru alltaf skrifuð í þessari röð og alltaf í millimetrum nema annað sé tekið fram.

Skýringarmynd: d er innra mál, D ytra mál og B breidd legunnar — **Alltaf í sömu röð.** Innra málið fyrst, þá ytra málið, þá breiddin. Lega sem er merkt 20 × 47 × 14 er með 20 mm gat, 47 mm að utan og 14 mm breið.

Hvernig þú mælir rétt

Mældu á legunni, ekki á öxlinum. Slitinn öxull mælist minni en hann á að vera og þá kaupirðu ranga legu. Mældu gatið á innri hringnum með skurðmáli.
Mældu ytra málið á ytri hringnum sjálfum, ekki á húsinu. Hús sem hefur verið snúið í eða soðið í er ekki lengur rétt viðmið.
Breiddin er mæld yfir ytri hringinn. Á innleggslegum stendur innri hringurinn út fyrir þann ytri og þá eru breiddirnar tvær, sjá töfluna hér á eftir.
Rúnnaðu að næsta staðlaða máli. Legumál eru stöðluð. Mælirðu 46,9 mm að utan er legan 47 mm; gatið er framleitt örlítið undir nafnmálinu af ásettu ráði svo hún sitji fast á öxlinum.

Mældu alltaf sjálf/ur ef númerið er ólæsilegt. Þrjú mál duga til að finna legu í langflestum tilvikum, og við getum flett þeim upp fyrir þig. Hringdu í 530 5900 með málin og segðu okkur hvort hún var opin, með járnlokum eða gúmmílokum.

Titillinn á hverri vöru er málsetningin

Við skrifum málin fremst í titilinn á hverri legu, svo þú getur leitað beint að málunum í leitarglugganum okkar í stað númersins. Svona lesast þau:

Titill hjá okkur	d	D	B	Hvað liggur að baki
Lega 20X47X14 Kúlulega lokuð	20 mm	47 mm	14 mm	Venjuleg djúpspora kúlulega, 6204-2RS
Lega 25X52X15 Kúlulega opin	25 mm	52 mm	15 mm	Sama lega án loka, 6205
Lega 32X58X13 Kúlulega lokuð	32 mm	58 mm	13 mm	Gatið gengur ekki upp í fimm, svo númerið er 60/32
Lega 3/4″X47X31 Kúlul.rúnuð ut	19,05 mm	47 mm	31 mm	Tommugat. UC204-12S í innleggshús
Lega 20x47x14/24.7 rúnuð utan	20 mm	47 mm	14 / 24,7 mm	Fjórða talan er heildarbreidd innri hringsins

Dæmi úr úrvalinu. Fyrstu þrjár tölurnar eru alltaf d × D × B.

Tommugöt og fjórða talan

Tommugöt

Hluti af innleggslegum er með tommugat, einkum í búvélum og færiböndum af bandarískum og breskum uppruna. Við skrifum það eins og það er: 3/4″, 1.1/4, 1.3/4, 2″.

Reiknaðu aldrei upp á næsta heila millimetra. 3/4″ er 19,05 mm og 1″ er 25,4 mm, og lega með 19 mm gat passar ekki á 19,05 mm öxul.

Þegar tölurnar eru fjórar

Á innleggslegum og sumum tvöföldum legum stendur fjórða talan fyrir heildarbreidd innri hringsins, sem er meiri en breidd ytri hringsins.

UB204 er skrifuð 20x47x14/24.7: ytri hringurinn er 14 mm breiður en innri hringurinn 24,7 mm, því hann stendur út til að taka stilliskrúfur eða stút.

Legunúmerið: hvað stafirnir þýða

Númerið á hringnum er ekki framleiðslunúmer. Það er lýsing samkvæmt ISO-staðli og hver stafur hefur fasta merkingu. Þegar þú kannt að lesa það þarftu hvorki vörulista né mæliband til að vita hvað þú ert með í hendinni.

6204-2RS

6Gerðin. Djúpspora kúlulega

2Þversniðsröðin. Meðalstór

04Innra málið. 04 × 5 = 20 mm

2RSViðskeytið. Tvö gúmmílok

Þetta er 20 mm lega, 47 mm að utan og 14 mm breið, lokuð báðum megin. Allt það stendur í fjórum stöfum og einu viðskeyti.

Tveir síðustu tölustafirnir: innra málið

Reglan er einföld þegar komið er upp fyrir 17 mm, en fjögur fyrstu málin eru undantekningar sem borgar sig að kunna utan að.

Kóði	Innra mál	Dæmi
Einn tölustafur, 608	Talan sjálf	608 er með 8 mm gat
00	10 mm	6200, 6300
01	12 mm	6201, 6001
02	15 mm	6202, 6302
03	17 mm	6203, 6303
04 og upp úr	Kóðinn sinnum 5	6204 er 20 mm, 6210 er 50 mm, 6020 er 100 mm
Með skástriki	Málið skrifað beint	60/32 er 32 mm, 62/28 er 28 mm, 63/22 er 22 mm

Innra málið út frá kóðanum. Sama regla gildir fyrir allar gerðir, ekki bara kúlulegur.

Skástrikið þýðir að gatið gengur ekki upp í fimm. Lega sem er merkt 60/32 er með 32 mm gat, ekki 160 mm. Við eigum nokkur slík mál, 22, 28 og 32 mm, og þau koma gjarnan fyrir í hjólabúnaði og á minni vélum.

Annar tölustafurinn: hversu stór legan er utan um gatið

Þversniðsröðin segir hversu mikinn málm legan hefur utan um sama gat. Hærri tala þýðir stærra ytra mál, meiri breidd og meira burðarþol, en líka meira pláss og hærra verð. Allar sex legurnar í töflunni eru til hjá okkur og þær eru allar með 20 mm gat:

Sex kúlulegur með 20 mm gati teiknaðar í réttum hlutföllum: 6804, 6904, 6004, 6204, 6304 og 6404 — **Sama gat, sex stærðir.** Teiknað í réttum hlutföllum eftir málunum úr vörulistanum okkar. 6404 er meira en tvöfalt þykkari í þversniði en 6804, og það er munurinn sem annar tölustafurinn lýsir.

Númer	d × D × B	Röð	Hvar hún á við
6804	20 × 32 × 7	18, mjög grönn	Þar sem plássið er ekkert og álagið lítið
6904	20 × 37 × 9	19, grönn	Létt álag, lítið byggingarrými
6004	20 × 42 × 12	10, létt	Almenn notkun á minni búnaði
6204	20 × 47 × 14	02, meðal	Algengasta röðin. Rafmótorar, dælur, almennt viðhald
6304	20 × 52 × 15	03, þung	Sama gat, meira burðarþol og meiri þvermál
6404	20 × 72 × 19	04, mjög þung	Þungt álag á grönnum öxli

Þversniðsraðir með sama innra mál. Málin eru tekin beint úr vörutitlunum okkar.

Fyrsti stafurinn: gerðin

Fyrsti stafur	Gerð	Dæmi hjá okkur	Hvað einkennir hana
6	Djúpspora kúlulega	6204, 6305, 6004	Langalgengasta legan
7	Hornsnertilega	7205BW, 7305BW	Tekur ásálag í aðra áttina. Oftast notaðar tvær saman
1	Sjálfstillandi kúlulega	1204, 1210, 1308	Tvær raðir af kúlum, þolir skekkju
2	Sjálfstillandi kúlulega eða veltikeflalega	2207, 2310, 22209, 21310	Fjórir stafir eru kúlulega, fimm stafir eru keflalega
3	Keflalega kónísk	30205, 32005, HR30212J	Geislaálag og ásálag saman
5	Þrýstilega	51103, 51205	Hreint ásálag
N, NU, NJ	Rúllulega	NU312	Mikið geislaálag, hringirnir aðskiljanlegir

Algengustu gerðarstafirnir og dæmi úr úrvalinu okkar.

Bókstafir fremst eru framleiðandans, ekki staðalsins. HR30205J er sama keflalega og 30205; HR og J eru merkingar NSK um útfærslu og efni. Leitaðu að kjarnanum í númerinu þegar þú berð saman tvo vörulista.

Viðskeytin aftan við númerið

Allt sem kemur á eftir grunnnúmerinu lýsir útfærslu. Það er þar sem lokin, legubilið, búrið og efnið standa, og tvær legur með sama grunnnúmeri geta hentað í gjörólík verk eftir því hvað stendur þar.

Viðskeyti	Hvað það þýðir	Hvað það hefur að segja
2RS, RS2, DDU, LLU, VV	Tvö gúmmílok	Þéttingin snertir innri hringinn. Besta vörnin gegn vatni og ryki. Aðeins meiri núningur og lægri hámarkshraði
ZZ, 2Z	Tvö málmlok	Lokin snerta ekki, svo núningurinn er minni og hraðinn meiri. Halda grófum óhreinindum úti en ekki vatni
DD	Lokuð báðum megin	Merking NSK fyrir gúmmíþéttingu. Vörurnar okkar með DD heita „kúlulega lokuð”
Ekkert viðskeyti	Opin lega	Engin lok. Þarf þéttingu í húsinu og smurningu þaðan. Má þvo og pakka upp á nýtt
NR	Splittisrauf og splitti	Rauf í ytri hringnum með láshring. Staðsetur leguna í gegnumgangandi húsi
N	Splittisrauf án splittis	Sama rauf, láshringurinn fylgir ekki
C2, CN, C3, C4, C5	Legubilið	CN er venjulegt og er ekki skrifað. Sjá næsta kafla
K	Kónískt gat	Gatið er keilulaga 1:12 og legan fer á fleyg eða spennuhólk
M	Messingbúr	Fyrir hærri hita, meiri hraða og þyngra álag en stálbúr
TN, TN9	Plastbúr	Létt, hljóðlátt og þolir titring vel. Takmarkað hitaþol
E, EC	Styrkt útfærsla	Fleiri eða stærri veltiefni, meira burðarþol í sama rými
SS	Ryðfrí	Í okkar vörunúmerum. Fyrir bleytu, matvælavinnslu og þvottaumhverfi

Algengustu viðskeytin. Framleiðendur nota ekki allir sömu stafina um sama hlutinn, svo berðu saman við vörulista framleiðandans þegar það skiptir máli.

Sama lega, þrenns konar lok. 6204 er opin, 6204ZZ er með járnlokum og 6204-2RS er með gúmmílokum. Málin þrjú eru nákvæmlega þau sömu og allar þrjár passa í sama húsið. Valið snýst um hvað þarf að halda úti og hversu hratt legan snýst.

Legubil: af hverju C3?

Legubil er leikurinn á milli veltiefnanna og brautanna áður en legan fer í. Þetta er ekki framleiðsluskekkja heldur hönnunarstærð, því bilið minnkar þegar legan er komin í vinnu. Þétt mátun á öxul þenur innri hringinn út, og hiti þenur innri hringinn meira en þann ytri af því að hitinn verður til inni í legunni og leitar út.

Þess vegna er valið svona: sé búist við því að bilið minnki mikið í vinnu, veljum við legu sem byrjar með meira bil. Það er allt sem C3 þýðir.

Flokkur	Bil	Hvenær hann á við
C2	Minna en venjulegt	Þar sem nákvæmni og lítill leikur skipta mestu
CN	Venjulegt	Sjálfgefið og er ekki skrifað í númerið. Á við í langflestum tilvikum
C3	Aukið	Hiti á legunni, þétt mátun á báðum hringjum, rafmótorar, titringur
C4	Mikið aukið	Mikill hiti eða mjög þétt mátun
C5	Mest	Sérhæfð notkun

Legubilsflokkar. Flokkurinn stendur aftast í númerinu, til dæmis 6205C3.

C3-lega finnst lausari í hendi en venjuleg lega og það er rétt eins og það á að vera. Hún er ekki slitin og hún er ekki gölluð. Lega sem er sett í með of litlu bili klemmist þegar hún hitnar, og þá hitnar hún enn meira. Sú hringrás endar alltaf á sama stað.

Skiptu ekki yfir í C3 upp á von og óvon. Ef framleiðandi tækisins tilgreinir venjulegt bil, settu venjulegt bil í. C3 á heima þar sem hitinn, mátunin eða handbókin kalla á það. Stóð C3 á gömlu legunni, settu C3 í aftur.

Gerðirnar og hvað hver þeirra er góð í

Gerðin ræðst af því úr hvaða átt álagið kemur, hversu hratt öxullinn snýst og hvort eitthvað má skekkjast. Hér eru þær gerðir sem við eigum, hver með sínu hlutverki.

Djúpspora kúlulega

Kúlur í djúpri braut í báðum hringjum. Hún tekur geislaálag vel og talsvert ásálag í báðar áttir, þolir mestan hraða af öllum gerðum og er ódýrust.

Þetta er fyrsta svarið í langflestum verkum: rafmótorar, dælur, viftur, hjól, færibönd og allt almennt viðhald. Hún þolir hins vegar enga skekkju að ráði.

Innleggslega með rúnnuðu ytra máli og stilliskrúfum

Innleggslega, rúnuð utan

Kúlulega með kúlulaga ytra máli og breiðari innri hring. Hún stillir sig sjálf í húsinu og er fest á öxulinn með stilliskrúfum eða stút, án þess að öxullinn þurfi öxlun eða lásrauf.

Hún er gerð fyrir leguhús og er því algengust í búvélum, færiböndum, blásurum og öllu því sem er sett saman úr öxli og festingu fremur en vélarhúsi.

Sjálfstillandi kúlulega

Tvær raðir af kúlum sem rúlla í einni kúlulaga braut í ytri hringnum. Þess vegna má innri hringurinn halla án þess að legan klemmist.

Hún er til fyrir löng öxulbil, grindur sem svigna og þar sem ekki er hægt að tryggja að tvö legusæti standi nákvæmlega í línu. Hún tekur minna álag en djúpspora lega af sömu stærð.

Veltikeflalega

Sama hugmynd og að ofan en með tunnulaga keflum í stað kúlna. Snertiflöturinn er margfalt stærri, svo burðarþolið er miklu meira.

Hún er þar sem álagið er þungt og skekkjan óhjákvæmileg: hrærivélar, mulningsbúnaður, stórir blásarar og vinnuvélar.

Keflalega kónísk

Keilulaga kefli á milli keilulaga brauta. Hún tekur þungt geislaálag og þungt ásálag í aðra áttina samtímis, og hringirnir eru aðskildir svo hana má setja í sitt í hvoru lagi.

Hún er nánast alltaf notuð í pörum, hvor á móti annarri, og þá er hægt að stilla leikinn við samsetningu. Hjólnöf, drifsköft og gírkassar.

Rúllulega

Sívöl kefli, lína af snertingu í stað punkts. Hún tekur meira geislaálag en kúlulega af sömu stærð og þolir mikinn hraða.

Í NU-útfærslunni hefur ytri hringurinn engar axlir, svo öxullinn má hreyfast eftir endilöngu þegar hann lengist við hita. Hún tekur ekkert ásálag.

Þrýstilega

Tvær skífur með kúlum á milli. Hún tekur ásálag og ekkert annað, og hún verður að hafa stöðugt álag á sér til að kúlurnar rúlli í stað þess að renna.

Hún er undir snúningsborðum, í lóðréttum öxlum, í tjökkum og þar sem þungi eða þrýstingur liggur eftir öxlinum.

Tvöföld kúlulega og hornsnertilega

Tvær raðir af kúlum sem halla hvor á móti annarri. Hún tekur ásálag í báðar áttir og þolir vel að velta, sem er ástæðan fyrir því að hjólalegur í bílum eru byggðar svona.

Stakar hornsnertilegur, 7-röðin, taka ásálag í aðra áttina og eru settar í pör. Snertihornið ræður hversu mikið ásálag þær taka.

Samanburður

Gerð	Geislaálag	Ásálag	Þolir skekkju	Hraði	Dæmi
Djúpspora kúlulega	Já	Nokkurt	Nei	Mjög hár	6204, 6305
Innleggslega rúnuð utan	Já	Nokkurt	Já	Meðal	UC205, UB204
Sjálfstillandi kúlulega	Já	Nokkurt	Já	Hár	1204, 2207
Veltikeflalega	Já	Já	Já	Meðal	22209, 21310
Keflalega kónísk	Já	Já	Nei	Meðal	30205, 32005
Rúllulega	Já	Nei	Nei	Mjög hár	NU312
Hornsnertilega	Já	Já	Nei	Hár	7205BW
Þrýstilega	Nei	Já	Nei	Lágur	51205

Hvað hver gerð tekur við. „Nokkurt” ásálag þýðir að legan ræður við það meðfram geislaálaginu en ekki sem aðalálag.

„Kónísk” þýðir tvennt ólíkt eftir því hvar það stendur. Í keflalegu kónískri eru keflin sjálf keilulaga. Í veltikúlulegu kónískri, til dæmis 2206K, er það gatið sem er keilulaga og legan fer á fleyg eða spennuhólk. Þetta eru óskyldir hlutir sem bera sama orð í titlinum.

Álagið og burðarþolið

Álag á legu kemur úr tveimur áttum og nánast alltaf báðum í einhverju hlutfalli.

Geislaálag

Álag þvert á öxulinn. Þyngd, reimspenna, keðjuátak og hliðarkraftur frá tannhjóli eru allt geislaálag.

Allar gerðir nema þrýstilegur eru fyrst og fremst gerðar fyrir það.

Ásálag

Álag eftir öxlinum. Þungi lóðrétts öxuls, átak frá skáhallandi tannhjóli og þrýstingur frá dælu eða viftu.

Hér skilur á milli gerða. Þrýstilega tekur ekkert annað, rúllulega tekur ekkert af því, og keflalega kónísk tekur hvort tveggja saman.

Skekkja

Öxull sem svignar, grind sem gefur eftir eða tvö legusæti sem standa ekki í línu skekkja innri hringinn miðað við þann ytri.

Djúpspora kúlulega þolir nánast enga skekkju. Sjálfstillandi gerðir og innleggslegur eru hannaðar fyrir hana.

C, C0 og endingarreikningurinn

Í vörulistum framleiðenda standa tvær tölur við hverja legu. C er burðarþol á hreyfingu, gefið í kN, og það er talan sem endingarreikningurinn notar. C0 er burðarþol í kyrrstöðu og segir hvað legan þolir án þess að kúlurnar þrýsti varanlegum förum í brautina.

Grunnending legu er reiknuð sem L₁₀ = (C/P)^p milljón snúningar, þar sem P er raunálagið á legunni og p er 3 fyrir kúlulegur og 10/3 fyrir keflalegur. Vísisveldið er ástæðan fyrir því að lítil lækkun á álagi lengir endinguna miklu meira en fólk býst við: helmingi minna álag á kúlulegu er áttfalt lengri ending.

Við gefum ekki upp C og C0 á vörusíðunum okkar. Þær tölur eru ekki í okkar gögnum og að giska á þær væri verra en að sleppa þeim. Þurfirðu að reikna endingu, flettu þá númerinu upp í vörulista framleiðandans, eða hringdu í 530 5900 og segðu okkur hvað á að bera.

Leguhús og innleggslegur

Leguhús er leiðin til að setja legu á öxul sem hefur hvorki öxlun, lásrauf né vélarhús utan um sig. Innleggslegan er rúnnuð að utan og situr í kúlulaga sæti í húsinu, svo hún stillir sig sjálf, og hún er fest á öxulinn með tveimur stilliskrúfum í gegnum breiða innri hringinn.

Standhús

Algengasta gerðin. Boltast á flöt undir eða yfir öxlinum. UCP205 er heil eining með 25 mm gati, og hún er sama hlutur og UC205 sett í P205.

Flansahús

Boltast á vegg eða þil sem stendur þvert á öxulinn. Til með tveimur boltagötum í sporöskjulöguðum flans og með ferköntuðum fjögurra gata flans.

Klofið hús

Efri hlutinn er skrúfaður af og legan tekin upp úr án þess að hreyfa öxulinn. Fyrir stærri öxla og þar sem niðurtími kostar mikið.

Hvítt plastleguhús fyrir blautt umhverfi

Plast- og blikkhús

Plasthús þola þvott, salt og bleytu og eru oftast pöruð við ryðfría legu. Blikkhús eru létt og ódýr lausn þar sem álagið er lítið.

Forskeyti	Gerð	Hvað einkennir hana
UCP	Standhús með legu	Heil eining, legan fylgir. Festist á flöt undir öxlinum
P	Standhús án legu	Húsið eitt og sér. Veldu UC-leguna við
F	Flansahús	Festist á vegg eða þil þvert á öxulinn
SNH, SNL	Klofið hús	Opnast í tvennt. Skipt er um legu án þess að taka öxulinn út
LPB	Blikkhús	Pressað stálhús. Létt og ódýrt, fyrir létt álag
PNP	Plasthús	Fyrir bleytu, þvott og matvælaumhverfi. Oft með ryðfrírri legu

Forskeytin í vörunúmerunum okkar.

Hvernig þú parar legu og hús

Byrjaðu á öxlinum. Talan aftast í númerinu gefur gatið eftir sömu reglu og áður: UC205 er 25 mm, UC207 er 35 mm. Tommugötin bera aukatölu, UC205-16S er 1″.
Veldu húsgerðina eftir því hvar þú getur fest. Flötur undir öxlinum kallar á standhús, þil þvert á hann kallar á flansahús.
Athugaðu efnið. Steypujárn er sjálfgefið. Bleyta, þvottur eða matvæli kalla á plast eða ryðfrítt.
Herðu stilliskrúfurnar á flatan hluta öxulsins ef hann er til staðar, og herðu báðar jafnt. Skrúfa sem bítur á hring veldur því að legan gengur til.

Skoða leguhús

Innleggslegur og kúlulegur

Lok, þéttingar og smurning

Opin

Engin lok. Hún er smurð úr húsinu og húsið verður að þétta fyrir hana. Hana má þvo og pakka upp á nýtt, sem er kostur í búnaði sem er tekinn reglulega í gegn.

Járnlok, ZZ

Málmskífa sem snertir ekki innri hringinn. Hún heldur grófum óhreinindum úti og feitinni inni, bætir engum núningi við og takmarkar ekki hraðann. Hún stöðvar ekki vatn.

Gúmmílok, 2RS eða DD

Gúmmívör sem liggur við innri hringinn. Besta vörnin gegn vatni, ryki og salti. Núningurinn er meiri og hámarkshraðinn lægri, og hún er fyllt feiti til frambúðar.

Smurningin

Lokaðar legur eru smurðar til frambúðar. Þær eru fylltar réttu magni af feiti í framleiðslu og það er hvorki hægt né ætlast til að bæta á þær. Þvoðu þær aldrei upp úr leysiefni, því feitin skolast burt og kemst ekki aftur inn.
Opnar legur í húsi eru endursmurðar um smurkoppinn. Smurbilið kemur frá framleiðanda tækisins og styttist í hita, bleytu, ryki og við stöðugan titring.
Fylltu húsið að hluta, ekki að fullu. Venjan er 30 til 50 % af frírýminu í húsinu. Of mikil feiti hitar leguna af því að veltiefnin þurfa að ryðja henni frá sér í sífellu, og ofsmurning er algeng orsök þess að lega hitnar skömmu eftir viðhald.
Blandaðu ekki ósamhæfðum feitum. Ólík þykkingarefni brjóta hvort annað niður og blandan annaðhvort rennur út eða harðnar.

Nánar um feitina sjálfa, NLGI-flokkinn og þykkingarefnin er á smurfeitisíðunni okkar.

Pakkdósin ver leguna. Þéttingin á öxlinum við hliðina á legunni er það sem heldur vatni og óhreinindum frá henni í flestum tækjum. Þegar lega er tekin upp borgar sig nánast alltaf að skipta um pakkdósina í leiðinni.

Skoða pakkdósir

Ísetning: það sem drepur nýja legu

Lega sem er rétt valin getur samt bilað á fyrstu vikunni, og þá er ástæðan nánast alltaf eitt af fernu: óhreinindi, rangt átak, röng mátun eða högg.

Hreinlæti fyrst. Taktu leguna ekki úr umbúðunum fyrr en sætið er hreint og þú ert tilbúin/n. Rykkorn í brautinni verður að punktskemmd undir fyrsta álagi.
Mældu öxulinn og sætið. Slitinn öxull heldur ekki legunni og hún byrjar að snúast á honum. Þá eyðist öxullinn hratt og legan er ekki orsökin.
Pressaðu á þann hring sem þú ert að máta. Fer legan á öxulinn, pressaðu á innri hringinn. Fer hún í húsið, pressaðu á þann ytri. Aldrei í gegnum kúlurnar, því þá færðu varanleg för í brautina sem heyrast um leið og hún fer af stað.
Eða hitaðu hana. Lega sem á að fara þétt á öxul fer auðveldlega á hann eftir upphitun í 80 til 110 °C, og 120 °C eru algeng efri mörk. Notaðu ofn eða spanhitara, aldrei opinn loga, og aldrei á lokaða legu með gúmmílokum.
Hvorugur hringurinn má snúast í sæti sínu. Sá hringur sem snýst miðað við álagsstefnuna fær þéttu mátunina, hinn má vera lausari svo hann geti hreyfst þegar öxullinn lengist. Á venjulegum öxli sem snýst þýðir það þétt á öxulinn og rennimátun í húsið. Nákvæmu vikmörkin standa í vörulista framleiðandans.
Snúðu henni í höndunum áður en þú ræsir. Hún á að snúast jafnt og hljóðlaust. Hik eða grófleiki þýðir að eitthvað er skakkt, klemmt eða skemmt, og það lagast ekki við notkun.

Verkfærin

Legupressa eða hólkur sem liggur nákvæmlega á þeim hring sem á að pressa. Í neyð dugar mjúkur hólkur og jafnt átak, en aldrei hamar beint á hringinn.

Aftakari með réttum kjafti tekur leguna af án þess að draga í gegnum kúlurnar. Sími 530 5900 ef þig vantar réttu stærðina.

Þegar legan kemur út

Geymdu gömlu leguna þangað til nýja er komin í. Númerið á henni, lokin og legubilið eru bestu heimildirnar um hvað á að fara í staðinn.

Skoðaðu líka hvernig hún leit út að innan. Jöfn mött braut er eðlilegt slit, en rifflur, punktaför, ryð eða brunalitur segja þér af hverju hún bilaði.

Legupressur

Hvað einkennin segja þér

Lega bilar sjaldnast án þess að gera boð á undan sér. Hljóð, hiti og leikur segja til um hvað fór úrskeiðis, og það er þess virði að lesa það af gömlu legunni áður en sú nýja fer í, því annars fer hún sömu leið.

Einkenni	Líkleg orsök	Hvað þú gerir
Jafnt ýlfur eða hvinur	Of lítið legubil, of þétt mátun, ofsmurning	Athugaðu hvort C3 átti að vera í og hversu mikil feiti er í húsinu
Reglubundið smell eða högg	Punktaför í brautinni	Legan hefur fengið högg eða verið pressuð í gegnum kúlurnar. Hún lagast ekki
Hiti sem vex jafnt og þétt	Ofsmurning, klemmd lega, skekkja	Stöðvaðu áður en hún tekur sig í sundur. Léttu á feitinni og mældu sætin
Leikur eða slag á öxli	Slitin lega eða of laus mátun	Mældu öxulinn og sætið. Lega sem snýst á öxlinum eyðir honum hratt
Ryð innan á brautunum	Vatn hefur komist inn	Röng lok eða ónýt pakkdós. Skiptu um hvort tveggja
Grátt, þurrt eða kögglótt efni	Feitin er búin eða of gömul	Styttu smurbilið eða veldu feiti sem þolir hitann betur
Fínar rifflur þvert á brautina	Rafstraumur hefur farið í gegnum leguna	Þekkt í rafmótorum með hraðabreyti. Þarf einangraða legu eða jarðbursta

Algeng einkenni og hvað liggur að baki.

Heimildir fyrir stærðar- og númerakerfinu: ISO 15 um ytri mál legu og uppbyggingu legunúmera, ISO 281 um endingarreikninginn (L₁₀) og ISO 5753 um legubilsflokka. Öll vörudæmi og öll mál í töflunum eru tekin úr okkar eigin vörulista. Yfirfarið 20. október 2026.

Hvernig þú velur rétta legu: sex skref

Lestu númerið af gömlu legunni. Sé það læsilegt ertu búin/n. Númerið geymir málin, gerðina, lokin og legubilið, og þú þarft ekkert annað.
Sé það ólæsilegt, mældu d, D og B. Mældu á legunni sjálfri og rúnnaðu að næsta staðlaða máli. Skrifaðu líka hjá þér hvort hún var opin, með járnlokum eða gúmmílokum.
Áttaðu þig á álaginu. Kemur það þvert á öxulinn, eftir honum, eða hvort tveggja? Það ræður gerðinni og er eina spurningin sem númerið svarar ekki fyrir þig þegar þú ert að hanna frá grunni.
Metið umhverfið. Vatn, þvottur, ryk eða matvæli kalla á gúmmílok og stundum á ryðfría legu eða plasthús. Þurrt og hreint vélarrými kemst af með járnlok.
Athugaðu hitann og mátunina. Hitni legan í vinnu eða sé hún pressuð þétt á báða hringi, þá á C3 við. Stóð C3 á þeirri gömlu, haltu þig við C3.
Skoðaðu hvað annað þarf að fylgja. Pakkdós, splitti, stilliskrúfur eða nýtt hús. Legan ein og sér dugar sjaldnast þegar búnaðurinn er kominn í sundur.

Stoppirðu á einhverju skrefi, hringdu í 530 5900. Það sem við þurfum að vita er númerið eða málin þrjú, hvernig lokin voru og í hvaða tæki hún fer.

Legur í okkar úrvali

Málin standa fremst í titli hverrar vöru, svo þú getur leitað beint að þeim. Sláðu inn 20x47x14 eða 6204 í leitina og þú færð allar útfærslurnar.

Kúlulegur

Stærsti flokkurinn. Djúpspora legur opnar, með járnlokum og með gúmmílokum, innleggslegur rúnaðar utan og ryðfríar útfærslur.

Allar kúlulegur →

Tvöföld kúlulega, breið með þéttingum á báðum hliðum

Lega 40X76X37 Kúlulega tvöföld

Vnr: 100 tmde08a63

15.137 kr.