K2 PRO · fagmannalína K2
K2 PRO hreinsiefni og bílaumhirða
Fagmannalínan frá K2. Þykkni sem þú þynnir eftir verkinu, úðabrúsar sem eru tilbúnir til notkunar, og klútarnir, burstarnir og áhöldin sem efnin kalla á. Sama línan ræður við forþvottinn á þvottaplaninu og lokafrágang á detailing-borðinu.
Hvað er K2 PRO?
K2 er pólskur framleiðandi bílaefna. Samkvæmt eigin kynningu hefur fyrirtækið framleitt bílaefni í rúm 25 ár, selur í yfir 90 löndum og er með nálægt 1.000 vörur á skrá. Framleiðslan er vottuð samkvæmt ISO 9001:2015 og ISO 14001:2015.
PRO er sá hluti úrvalsins sem framleiðandinn beinir að verkstæðum, þvottastöðvum, detailing-stofum og lakkverkstæðum. Efnin þekkirðu á umbúðunum: svört flaska, litamerkt eftir vöru og orðið PRO sett við hliðina á vöruheitinu. Stóru efnin fást líka í 5 L og 20 L umbúðum.
Hjá Poulsen nær línan yfir allan hringinn. Sápur og forþvottaefni, felguhreinsar og dekkjagljái, innréttingaefni og leðurumhirða, glerhreinsir og vatnsfæla, bón og detailer. Svo klútar í fimm þykktum, burstar fyrir felgur og innréttingu, þvottahanski og þvottapúði.
Hverjum hentar línan?
- Þvottastöðvum og verkstæðum sem þvo marga bíla á dag og vilja borga fyrir efni frekar en vatn.
- Bílasölum og bílaleigum þar sem útkoman þarf að vera sú sama í hvert skipti.
- Detailing-stofum sem vinna eftir þrepum og þurfa efni sem tala saman.
- Bíleigendum sem gera þetta sjálfir og vilja sömu efni og fagmaðurinn notar.
Svona raðast verkið
Efnin í línunni eru hugsuð sem þrep í sömu vinnu. Röðin skiptir máli: hvert þrep á að taka burt það sem annars endar undir áhaldinu í næsta þrepi.
- Forþvottur. Bela Neon PRO fer sem froða á þurran og kaldan bíl í skugga og vinnur í 3–5 mínútur. Froðan er bleik, svo þú sérð hvar hún liggur og hvar hún er að þorna.
- Felgurnar á undan lakkinu. Roton PRO er gelkenndur járnagnahreinsir sem verður rauðfjólublár þar sem hann hittir járnagnir, með um 3–4 mínútna vinnslutíma. Neorim PRO er alkalíski kosturinn fyrir lakkaðar felgur, áberandi grænn og um 2 mínútur. Wheel Scepter PRO nær milli felguarmanna.
- Handþvottur. Vena PRO, 20–50 ml í 10 L vatns, með Wash Mitt PRO eða Wash Pad PRO. Notaðu tvær fötur, aðra með sápu og hina til að skola áhaldið, og þvoðu ofan frá og niður.
- Afmengun ef lakkið er hrjúft. Poly PRO er 30 × 30 cm klútur með fjölliðuvinnslufleti sem kemur í stað hefðbundins leirs. Hann þarf smurningu og litla pressu; ekkert má dragast þurrt yfir lakkið.
- Þurrkun. Flossy PRO er 60 × 90 cm og 800 g/m². Hidron PRO má úða á blautt lakk og skola, þá fara bónmeðferðin og þurrkunin fram í sömu ferð.
- Frágangur. Spectrum PRO gefur gljáa á hreint lakk, Vizio PRO vatnsfælu á ytri rúður og Sigma PRO sér um dekkjahliðarnar.
Súra sápan er sérverkefni. Fluxo PRO er með pH um 4 samkvæmt framleiðanda og er ekki vikulega sápan. Hún er efnið sem þú grípur þegar steinefnaútfellingar fara að draga úr gljáa eða vatnsfráhrindingu á vaxi og keramikhúð.
Þvottur, forþvottur og alhliða hreinsiefni
Hér byrjar allt. Vena PRO er handþvottasápan og er ætluð til að viðhalda vaxi og keramikhúð samkvæmt framleiðanda. Bela Neon PRO er froðusápan fyrir froðubyssu eða skömmtunarkerfi. Fluxo PRO er súra sápan fyrir steinefnaútfellingar.
APC-efnin tvö eru alhliða þykkni fyrir allt hitt. Neutral er pH-hlutlaust og fer á plast, vínil, gúmmí og þolinn textíl; Strong tekur við þegar mengunin er fitug eða föst. Bæði spanna 1:80 fyrir létt óhreinindi niður í 1:10 fyrir þau erfiðu.
Hlutlaust pH er ekki sama og skaðlaust. APC Neutral er áfram hreinsiefni og þolprófun á viðkvæmu efni er jafn nauðsynleg.
Sápur, forþvottur og alhliða hreinsiefni
Allt K2 PRO úrvalið →
Felgur og dekk
Tveir felguhreinsar sem gera ekki sama hlutinn. Roton PRO er gelkenndur járnagnahreinsir og situr á yfirborðinu meðan hann vinnur, með litbreytingu sem sýnir hvar hann hittir járnmengun. Neorim PRO er alkalískur, grænn og hraðari, ætlaður lökkuðum felgum.
Dekkjahliðarnar fá Sigma PRO. Létt afþurrkun gefur hófstillta áferð, og ef þú vilt meiri gljáa má bæta öðru þunnu lagi á eftir um 5 mínútur. Traco PRO ásetningarburstinn heldur efninu þar sem það á að vera.
Neorim fer ekki á hvað sem er. Framleiðandinn undanskilur ólakkaða málma, anodíseraða fleti og króm, og felgur á mótorhjólum á að skoða sérstaklega. Litbreyting Roton segir ekkert um hvort flöturinn þoli efnið; þolprófaðu viðgerðar- og sérhúðaðar felgur.
Felguhreinsar, dekkjagljái og felguburstar
Allt K2 PRO úrvalið →
Hvað þýðir 1:50?
Þykkni er ódýrara á hvern notaðan lítra, tekur minna pláss í geymslu og sama flaskan ræður við fleiri verk eftir því hvernig þú blandar hana. Á móti þarftu að vita hlutfallið. Fyrri talan er efnið, sú seinni vatnið, svo 1:50 eru 20 ml í lítra af tilbúinni blöndu.
| Efni | Verkið | Blöndun |
|---|---|---|
| K2 Vena PRO bílasápa | Handþvottur | 20–50 ml í 10 L vatns |
| K2 Fluxo PRO súr sápa | Reglulegur handþvottur | 10–50 ml í 10 L vatns |
| K2 Fluxo PRO súr sápa | Viðhald á vaxi og húðun | 40–100 ml í 10 L vatns |
| K2 Bela Neon PRO froðusápa | Froðubúnaður | 1:10 – 1:20 |
| K2 Bela Neon PRO froðusápa | Handþvottur | 1:50 – 1:100 |
| K2 APC Neutral og Strong PRO | Létt óhreinindi | 1:80 |
| K2 APC Neutral og Strong PRO | Erfið ytri óhreinindi | 1:10 |
| K2 Lotar PRO áklæðahreinsir | Bílaáklæði | 1:10 – 1:15 |
| K2 Lotar PRO áklæðahreinsir | Viðkvæmur textíll | 1:40 – 1:60 |
Byrjaðu á veikustu blöndunni sem skilar verkinu. Sterkari blanda hreinsar ekki sjálfkrafa betur, hún eyðir bara meira efni. Og ekkert þessara efna má þorna á yfirborðinu, hvorki á lakki né felgu.
Bón, gljái og vatnsfæla
Hidron PRO er blautbónið. Þú úðar því á hreint, blautt lakk og skolar, og þurrkunin verður léttari í leiðinni af því að vatnsfilman brotnar upp. Það má líka bera það á þurrt lakk og fægja með örtrefjaklút.
Spectrum PRO er fljótandi detail-bón með syntetísku vaxi fyrir gljáafrágang, og nýtist á samhæfar plast-, gúmmí- og krómskreytingar eftir prófun. Bæði eru viðhaldsefni fyrir hreint lakk og hvorugt lagar rispur.
Aldrei bón yfir óhreint lakk. Sandur undir klútnum rispar, sama hversu mjúkur hann er. Þvoðu fyrst, afmengaðu með Poly PRO ef lakkið er hrjúft, og bónaðu svo.
Bón og detailer
Allt K2 PRO úrvalið →
Rúður og framljós
Nuta PRO er glerhreinsirinn. Hann gufar hratt upp, sem er kosturinn og vandamálið í senn: lítið magn, hrein klútahlið og tveir klútar gefa rákalausa útkomu, mikið magn gefur rákir.
Vizio PRO er vatnsfælan á ytri rúður. Hún þarf hreint og fituhreinsað gler, 8–12 mínútna bið áður en þú pússar, um 20 mínútur ef þú setur annað lag, og um 8 klukkustundir í fulla herðingu. Hún kemur ekki í stað góðra þurrkublaða.
Vapron PRO er svo verkstæðishliðin á þessu: gufumeðferð fyrir mött pólýkarbónatljós eftir stýrða votslípun, með upphituðum bolla og sérhæfðum vinnsluvökva. Áfyllingarvökvi fæst sér.
Skynjarasvæði og filmur. Vizio á ekki að fara á myndavéla- eða skynjaraglugga nema bílframleiðandinn heimili það, og sérhúðað eða skyggt gler þarf þolprófun fyrst.
Glerhreinsir, vatnsfæla og ljósaendurbætur
Allt K2 PRO úrvalið →
Innréttingin
Purio PRO hreinsar plastfletina og skilar þeim hreinum og náttúrulegum, án gljáa. Satina PRO er umhirðuefnið sem kemur á eftir: það dýpkar litinn og gefur satínáferð sem situr mitt á milli matts og glansandi. Satina er lyktarlaust, sem skiptir máli ef bíllinn er þegar með ilmgjafa.
Sofrano PRO er pH-hlutlaust fyrir slétt og gatað leður og heldur áferðinni mjúkri án þess að gljáa hana upp. Lotar PRO er áklæðaþykknið fyrir sæti, mottur og teppi og vinnur bæði með bursta og blautútsogsvél.
Ekki á gripfleti. Umhirðuefni fara hvorki á pedala, stýrisgrip né sætisfleti. Sofrano á heldur ekki við rúskinn, nubuck eða olíuborið leður.
Mælaborð, plast, leður og áklæði
Allt K2 PRO úrvalið →
Klútarnir, og hvaða klút í hvað
Gramþyngdin ræður mestu. Þykkur klútur heldur meiri vökva og er mýkri undir, þunnur klútur er handhægari og má fara í hversdagslegri verk. Allir klútarnir í línunni eru 80 % pólýester og 20 % pólýamíð.
Haltu þeim aðskildum eftir verkum. Klútur sem hefur farið á felgu á ekki erindi á lakk, og glerklútur sem hefur snert bón skilar rákum það sem eftir er. Framleiðandinn tiltekur þvott við allt að 40 °C, án bleikiefna og mýkingarefna.
| Klútur | Stærð | Gramþyngd | Verkið |
|---|---|---|---|
| K2 Hiro PRO, 30 stk. | 30 × 30 cm | 170 g/m² | Létt þrif, nýr klútur í hvert verk |
| K2 Lefa PRO | 40 × 40 cm | 340 g/m² | Leður og afþurrkun hreinsileifa |
| K2 King PRO | 40 × 60 cm | 500 g/m² | Þurrkun lakks og afþurrkun bóns |
| K2 Flossy PRO | 60 × 90 cm | 800 g/m² | Þurrkun stærri flata eftir þvott |
| K2 Lussy PRO | 40 × 40 cm | 1.200 g/m² | Fægja, vax og detail-frágangur |
Poly PRO er leirinn án leirsins. 30 × 30 cm klútur með fjölliðuvinnslufleti sem þú skolar hreinan, í stað leirs sem þarf að henda um leið og hann dettur í sandinn.
Klútar, hanskar og leirun
Allt K2 PRO úrvalið →
Burstar og áhöld
Wheel Scepter PRO er 45 cm langur með 25 cm vinnsluflöt og varinn odd, gerður til að fara inn á milli felguarma. Brill PRO er borvélarburstinn fyrir áklæði, mottur og plast, með 10 cm haus og ¼ tommu sexkant.
Detail-burstarnir tveir eru ekki eins. Pino PRO er mjög mjúkur, 17 cm á lengd með 5 cm hárum, og fer á viðkvæma fleti. Flato PRO er nettari og skorinn til að ná við merki, loftræstiop og samskeyti.
Borvél margfaldar það sem þú gerir. Brill PRO vinnur miklu harðar en handbursti, svo byrjaðu á vægri stillingu, haltu honum á hreyfingu og prófaðu alltaf á földum stað.
Felguburstar, detail-burstar og ásetningaráhöld
Allt K2 PRO úrvalið →
Algengar spurningar um K2 PRO
Hver er munurinn á K2 PRO og venjulegu K2?
PRO er sá hluti K2-úrvalsins sem framleiðandinn beinir að verkstæðum, þvottastöðvum, detailing-stofum og lakkverkstæðum. Í reynd þýðir það stærri umbúðir, þykkni í stað tilbúinna blandna á mörgum vörum, og blöndunartöflu með hverri flösku.
Venjulega K2-línan er sama framleiðslan en pakkað fyrir almennan kaupanda. Þú getur notað PRO-efnin heima án vandræða; þú þarft bara að blanda þau.
Þarf ég sérstakan búnað?
Nei fyrir flest. Handþvottur með tveimur fötum og þvottahanska dugar fyrir Vena, og úðabrúsavörurnar eru tilbúnar til notkunar beint úr flöskunni.
Froðusápan Bela Neon nýtur sín best með froðubyssu eða froðuskammtara, og Brill PRO þarf bor- eða skrúfvél. Vapron-kerfið er hins vegar verkstæðisbúnaður og krefst þjálfunar.
Hvaða efni ætti ég að byrja á?
Bílasápa og klútur. Vena PRO fyrir þvottinn, Flossy PRO til að þurrka og Lussy PRO fyrir frágang, þá ertu kominn með grunninn.
Næsta skref ræðst af bílnum. Eru felgurnar brúnar af bremsuryki? Þá felguhreinsir og Wheel Scepter. Er mælaborðið orðið mött og rykugt? Purio og Satina. Er lakkið hrjúft viðkomu eftir þvott? Poly PRO.
Hvað endist 1 lítri af þykkni?
Það fer eftir hlutfallinu. Vena PRO í 10 L fötu með 20–50 ml skammti gefur 20 til 50 fötur úr lítranum. APC-efnin blönduð 1:80 gefa um 81 lítra af tilbúinni blöndu úr lítranum, en 1:10 gefa um 11 lítra.
Þess vegna er verð á flöskunni ekki sami hluturinn og verð á notaðri blöndu, og þess vegna borgar sig að blanda veikustu blönduna sem skilar verkinu.
Má nota þessi efni á keramikhúðað eða vaxað lakk?
Vena PRO er beinlínis ætluð til að viðhalda vaxi og keramikhúð samkvæmt framleiðanda, og Fluxo PRO er með sérstakan skammt fyrir viðhald á húðun, 40–100 ml í 10 L.
Sterku efnin eru annað mál. APC Strong og alkalískir felguhreinsar eru ekki viðhaldsefni fyrir húðun. Fylgdu líka umhirðufyrirmælum þeirrar húðunar sem er á bílnum, þau ganga framar almennum ráðum.
Hvaða felguhreinsi á ég að velja?
Roton PRO þegar bremsurykið er fast og þú vilt sjá hvar járnmengunin situr. Gelið helst á fletinum meðan það vinnur í 3–4 mínútur og verður rauðfjólublátt þar sem það hvarfast við járnagnir.
Neorim PRO fyrir hraðari viðhaldsþrif á lökkuðum felgum. Hann er alkalískur, grænn á litinn og vinnur í um 2 mínútur. Framleiðandinn undanskilur ólakkaða málma, anodíseraða fleti og króm.
Af hverju verða rákir á rúðunum?
Oftast af of miklu efni eða of fáum klútum. Nuta PRO gufar hratt upp, svo úðaðu sparlega, hreinsaðu með fyrsta klútnum og þurrkaðu með öðrum, þurrum glerklút.
Inni í bílnum borgar sig að úða á klútinn frekar en á rúðuna, þá fer ekkert á mælaborðið. Skoðaðu svo rúðuna frá fleiri en einu sjónarhorni áður en þú hættir, rákirnar sjást sjaldnast beint framan frá.
Hvernig þvæ ég örtrefjaklútana?
Framleiðandinn tiltekur allt að 40 °C, án bleikiefna og án mýkingarefnis. Þvoðu þá aðskilda frá venjulegum þvotti svo þeir taki ekki í sig ló.
Haltu þeim líka aðskildum eftir verkum. Felguklútur og lakkklútur eiga ekki að lenda í sömu hrúgu, og klútur sem hefur farið í sand á ekki afturkvæmt á lakk.
Fæ ég öryggisblöð fyrir efnin?
Já. Öryggisblöð og tæknilýsingar eru aðgengileg á vörusíðunum þar sem þau eru til. Finnir þú ekki blað fyrir tiltekna vöru skaltu hafa samband og við sækjum það frá framleiðanda.
Eru stærri umbúðir til?
Já, nokkur efnanna fást í stærri umbúðum fyrir þá sem nota mikið. Roton PRO er til dæmis skráður í 750 ml, 1 L, 5 L og 20 L, og Vena PRO í 1 L og 5 L.
Nákvæmar stærðir og verð koma fram á hverri vörusíðu. Vantar þig stærð sem er ekki á vefnum skaltu hafa samband og við könnum málið.
Óviss um hvaða efni þú þarft?
Við þekkjum línuna og hjálpum þér að velja rétt efni, rétta blöndun og réttu áhöldin fyrir verkið. Hringdu í 530 5900 eða sendu okkur fyrirspurn.